Tradisjon og kultur viktig i matopplevinga

Gro Elden

- Vi må ta vare på den opprinnelege og sereigne smaken i det norske kjøken. Lokal tradisjon og kultur er viktig i matopplevinga, sa Arne Brimi under den første forelesninga si som æresdoktor ved UMB.

Tittelen på forelesninga sist fredag var ”Den opprinneleg smaken”. - Noreg har unike råvarer med unike smakar som vil bli stekt ettertrakta i Europa, hevda Brimi til ei stor og lydhør forsamling i den gamle festsalen i Urbygninga.

Unike råvarer
Foredraget til Brimi var ein del av eit masterkurs i sensorikk og forbrukarforståing i matvitskapsstudiet på UMB. Kokken frå Lom inviterte til samarbeid mellom kokkar og forskarar.

- Vi har ei mengd framifrå råvarer, frå land og hav, å byggja samarbeidet på. I det norske og nordiske kjøkenet må vi ta vare på den opprinnelege smaken med lokal forankring. Vi må gje varene ein avsendar, og kundane må få ei total og heil matoppleving.

Forflating
Arne Brimi vart utnemnd til æresdoktor under den offisielle opninga av Universitetet for miljø- og biovitskap 23. mai i fjor. Han fekk æresgraden av di han har fornya norske mattradisjonar som byggjer på gamal kunnskap og kultur, og plassert dei i samanheng med nye idear og impulsar.

I forelesninga på Ås åtvara Brimi mot forflatinga i matvegen.

- Alt blir likare i smak. Vi har gløymt det grunnleggjande og tek snarvegar, og lagar ”matkopiar” i rekkje og rad. Til slutt trur vi det er slik det skal vera. Men då ser vi bort frå den opprinneleg og sereigna smaken som er så viktig, sa Arne Brimi.

Matvitskap på Ås
Studiet i matvitskap ved UMB på Ås gjev brei fagleg kompetanse i mange emne, slik som grunnleggjande ernæring, mikrobiologi, biokjemi, teknologi, kvalitet og hygiene. Når master-kandidatane skal spesialisera seg, kan dei velja mellom mat og helse, matproduksjon, mattryggleik og matproduksjon. Dette er kompetanse som næringslivet gjerne vil, og dei fleste studentane får tilbod om jobb før dei er ferdige med studiet.

Oppdatert: 25.01.06
Utskriftsvennlig versjon

Del med en venn:

Universitetet for miljø- og biovitenskap (UMB)

[Besøksadresser] [Kontakt UMB] [Oversiktskart] [Ansvarlig redaktør]