Bjørg Lirhus arbeidar som miljøhygienikar ved Miljørettet helsevern i Indre Østfold IKS (MHVIØ).
Kan du fortelje litt om den jobben du har no? - Eg jobbar i eit Interkommunalt selskap med 4 tilsette. I tillegg til meg jobbar det 1 lege, 1 ernæringsfysiolog og 1 ingeniør. Me jobbar difor innan eit breitt spekter av fagområder. Førebyggande helsearbeid er hovudmålet, og eg har ansvar for saksbehandling og rådgjeving innanfor fylgjande fagfelt/tema: badevatn, private drikkevasskjelder, slam, utslepp frå separate hus, skadedyr, tilsyn med badebasseng og frisør- og hudpleiesalongar. Mange varierte oppgåver både på kontoret og ute i felten.
Kvifor valgde du UMB? - Ganske tilfeldig. Byrja på Ås fordi eg hadde lyst til å studera biologi og husdyretologi. Etterkvart fann eg andre fag som og var interessante, og enda opp med hovudsakeleg geofag.
Kva for nytte har du av utdanninga di i jobben? - Eg har arbeidsoppgåver innanfor eit breitt fagfelt, og såleis har det vore veldig nyttig for min del å ha den breie utdanninga som eg fekk mogelegheit til å ta på Ås. Har både grunnfag biologi og geofag.
Kva kan du seie om studentmiljøet på Ås? - Studentmiljøet ved UMB er heilt fantastisk, og vil nok vera det eg kjem til å tenkja på når eg skal minnast dei 5 åra som student på Ås. Eg har fått sjansen til å verta kjent med utruleg mange bra folk! Eg trur vel heller ikkje det er mange stader ein finn så mange bra bukollektiv som på Ås!
Nokre råd til kommande studentar? - Det er viktig å ta fag ein tykkjer er interessante, og som har inspirerande og gode førelesarar. Dette er spesielt viktig ved val av masteroppgåve, då det her er heilt naudsynt å ha inspirerande veiledning. Engasjemang i ymse lag og foreningar på samfunnet er veldig inspirerande og morosamt. Av dette har eg lært veldig mykje – og fått mange artige venner. Når ein har det bra sosialt klarar ein yta meir på skulen og! Trur det kan vera lurt å snusa borti eit breitt spekter av fag i starten av studiet. Det er og ein fordel å ta litt økonomifag, jus og forvaltingsfag, spesielt dersom ein ser for seg ein jobb i det offentlege.
